Wardering veur netuurfilms over reptielen en amfibienen

Berkoop - Et wodde deensdagaovend eem infermetieve netuuraovend in et gebouw van de Stellingwarver Schrieversronte in Berkoop.

Daor vertoonde Andries van der Veen uut Wolvege zien beide ni’je netuurfilms over reptielen en amfibienen in Stellingwarf. Veur de beide films, die Van der Veen speciaol maekt het t.b.v. et vak Hiemkunde in et basisonderwies, was bi’j de meensken die de aovend mitmaekten ommeraek veul wardering.

Grote belang

Tussen de beide films deur vertelde de van oorsprong van Ni’jberkoop kommende Van der Veen over hoe ien en aander in zien wark gaon kan tiedens et filmen. Hi’j gaf daornaost veul anvullende infermaosie over de beide onderwarpen. Van der Veen nuumde butendat nog es et grote belang om kiender zien te laoten wat d’r an netuur in de eigen leefomgeving en soms vlakbi’j huus omme allemaole te zien is.

Lesmateriaol ontwikkeld

Bi’j de beide films wodt nog speciaol lesmateriaol ontwikkeld en eerdaegs zullen beide films en dat lesmateriaol op de speciaole webstee veur Hiemkunde in et basisonderwies (www.stellingwerf-heemkunde.nl) plaetst wodden.