Fins tiedens twiede Stellingwarfs Meziekfestival

Hooltpae - Zaoterdag 16 november wodt veur de twiede keer et Stellingwarfs Meziekfestival holen in de Rustende Jaeger in Hooltpae. De opzet van et festival zal wat eers wezen as de veurgaonde keren.

In plak van zes dielnemers bin et d’r dit keer viere, zodat d’r veur iederiene wat meer tied en ruumte is om van him of heur heuren te laoten. Et doel is om vanof volgend jaor et festival te verbrieden, dat hoolt in dat d’r dan ok dichters en schrievers an et festival mitdoen gaon.

Carolien Hunneman

Dit keer doen an et festival mit: Et Veenpoolderkoor van Scharpenzeel (o.l.v. Madelon Kok uut Ni’jhooltpae), Lammy Bruyns (Et Vene/Vinkege) en Carolien Hunneman (Finlaand/Oosterwoolde).

Et Veenpoolderkoor brengt veural lieties naor veuren uut de ommeraek bekende Stellingwarf Cantate; naor dat optreden kieken now al veul meensken uut. Lammy Bruyns laot veural ni’je lieties heuren mit teksten van Harmen Houtman; ze begeleidt heurzels op de moenieke. Ok Carolien Hunneman het een tal ni’je lieties in et Stellingwarfs, mar ze laot grif ok een peer Finse heuren.

Sund al weer hiel wat jaoren woont Carolien, die van oorsprong van Oosterwoolde komt, in de Finse heufdstad Helsinki. Carolien begeleidt heurzels op ’e gitaar; heur Stellingwarver teksten bin veur et grootste pat schreven deur heur heit Wim.

Vlak veur et schoft zal Emma Winter van Wolvege et lied ‘Stellingië’ à capella zingen. Dat is et filmlied van de film ‘Daor klept de klokke weer’, en ok in die film wodt dit lied zongen deur Emma.

Et festival begint om 20.00 ure en is zo tegen 23.00 ure oflopen.

De toegang is vergees, mar een kleine financiële gift wodt deur de orgeniserende Stellingwarver Schrieversronte op pries steld.