Verfilming van De Verdwenen Peerden

Berkoop - Naodat veurig jaor op 3 en 4 augustus de theatertocht ‘De Verdwenen Peerden’ oflopen was, zoj’ daenken dat de beide peerden now echt vot wezen zollen.

Mar niks is minder waor, want bi’j et projekt heurde ok de verfilming van dit oolde verhael uut Ni’jberkoop. Veur die film zorgt et artistiek kollektief ’Het Kanaal’ uut Grunningen, mit o.e. Patrick Hoving, die ofkomstig is van Basse, een klein plakkien vlakbi’j Steggerde. Hoving rondde de oflopen junimaond mit goed risseltaot zien opleiding of an keunstakedemie Minerva in Grunningen, en gong kot daornao an de slag mit zien opdracht veur de Stellingwarver Schrieversronte.

‘Het Kanaal’ bestaot uut jonge meensken die krek ofstudeerden an et konservatorium, heur opleiding volgden op Minerva, of nog studeren an de Popakedemie in Liwwadden. De groep, die wisselend van grootte is, trad kotleden nog op tiedens Oerol en op Noorderpop mit een eigen theaterveurstelling.

Heufdrolle veur Andries van der Veen

Veur et verfilmen was Hoving, tegere mit zien kollektief, oflopen weke in Ni’jberkoop om zien impressie en interpretaosie van et verhael in filmbeelden omme te zetten. Iene van de heufdrollespeulders is Andries van der Veen uut Wolvege, die liekewel as oold-inwoner van Ni’jberkoop et dörp op zien doempien kent.

‘Het Kanaal’ legt verbanen tussen vroeger en now, tussen oold en jong; veural ok om mit mekeer de zorg te dregen veur mekeer. Daor heurt ok de oorspronkelike tael van de streek, in dit geval et Stellingwarfs, bi’j.

In september zal de film op verschillende plakken vertoond wodden. Waor en wanneer dat wezen zal, wodt nog bekend maekt deur de Stellingwarver Schrieversronte.

Blievend beeld

In de film is d’r een scene te zien rond een beeld. Et beeld is een blievende herinnering an et verhael van de peerden, en wodde maekt deur Janneke Hoek, krek as Hoving juust ofstudeerd an Minerva. Et beeld is in de bos van Boshoeve plaetst, vlak bi’j de ingang an de Grindweg. Daor wodde ok filmd; filmd wodde d’r ok in et Diakenievene en op ’e Delleboersterheide. Et kollektief huusde tiedens de filmdaegen op et oolde sportterrein en in de dörpskantine van Ni’jberkoop.